Ég var aldrei með anorexíu

Fyrirsætan Kate Moss prýðir forsíðu desemberheftis tímaritsins Vanity Fair. Kate er ber að ofan á myndum inn í blaðinu og er afar einlæg í viðtali við tímaritið.

"Ég fór í vinnuna á morgnana og það var enginn matur þar. Það fór aldrei neinn með mig í hádegismat þegar ég byrjaði í bransanum en ég var aldrei með anorexíu. Þeir sem ég vann fyrir vissu að þessi orðrómur var ekki sannur – annars hefði ég ekki fengið vinnu. Ég var mjó en það var út af því að ég var að taka þátt í sýningum og vinna mjög mikið," segir Kate um orðróminn um að hún hafi verið haldin átröskun í byrjun ferilsins.

Þá hefur líka verið talað um að hún hafi ánetjast heróíni.

"Ég hef aldrei notað heróín," segir Kate. Hún tjáir sig líka um fyrrverandi kærasta sinn, leikarann Johnny Depp, og sorgina sem fylgdi sambandsslitum þeirra.

"Það hefur enginn náð almennilega að hugsa um mig en Johnny gerði það í smá tíma. Ég trúði því sem hann sagði og ég saknaði þess þegar ég fór. Ég missti manneskju sem ég gat treyst. Það var martröð. Ég grenjaði í mörg ár."