Tom Cruise vill 6.3 milljarða í skaðabætur

Bandaríski stórleikarinn Tom Cruise hefur höfðað skaðabótamál á hendur tveimur götublöðum. Miðlarnir héldu því fram að leikarinn hefði yfirgefið dóttur sína í kjölfar skilnaðar hans og Katie Holmes.

Eins og frægt er orðið var Cruise hér landi við tökur á stórmyndinni Oblivion þegar Holmes fór óvænt fram á skilnað. Ákvörðunin kom Cruise í opna skjöldu enda fór Holmes fram á fullt forræði yfir dóttur þeirra, Suri Cruise.

Bandarísku slúðurblöðin In Touch og Life & Style staðhæfðu að Cruise hefði yfirgefið dóttur sína.

Nú hefur Cruise ákveðið að kæra tímaritin og móðurfélag þeirra, þýska útgáfufyrirtækið Bauer Media.

Talsmaður Cruise sagði Reuters að leikarinn myndi fara fram á 50 milljónir bandaríkjadala í skaðabætur eða það sem nemur rúmlega 6.3 milljörðum íslenskra króna. Vinni Cruise málið mun hann gefa peningana til góðgerðarmála.