Fyrsta sýning Þorbjargar í átta ár

Maður er bæði spenntur og smá hnútur í manni," segir Þorbjörg Höskuldsdóttir myndlistarmaður spurð hvernig það leggist í hana að opna fyrstu einkasýninguna í átta ár. Sýningin sem um ræðir nefnist Ásýnd fjarskans og verður opnuð í Listasafni Reykjanesbæjar klukkan 18 í dag.

"Það er alltaf spenna í manni," segir Þorbjörg. "Maður er að leggja sjálfan sig á borðið og bíða dóms. En það er líka voðalega gott að sjá afrakstur vinnu sinnar kominn heim og saman upp á vegg."

Verkin á sýningunni eru öll landslagsmálverk og Þorbjörg segist hafa lokið þeim öllum á þessu ári en þau hafi verið í vinnslu í tvö til þrjú ár. En hvað kom til að hún sýndi ekki í allan þennan tíma?

"Tími hrunsins hjá okkur var nú ekkert spennandi fyrir sýningar," segir hún. "Það voru fáir sem voru á þeim nótunum að sýna og ég hugsaði ekkert út í það. Reyndi bara að safna í sarpinn. En það var ósköp gott að fá þetta boð frá Listasafni Reykjanesbæjar til að sparka sér í gang."

Þorbjörg á að baki langan og glæstan feril í myndlistinni, hélt fyrstu einkasýninguna árið 1972 og nú er verk eftir hana að finna í öllum helstu listasöfnum landsins. Hún segist þó ekki hafa gert sér grein fyrir því að í ár væru fjörutíu ár frá fyrstu sýningu hennar. "Ég hef verið þrautseig við þetta í gegnum árin," segir hún, "en ég hafði ekkert hugsað út í að þetta væri afmælisár, það gerir þetta enn þá skemmtilegra." - fsb