Páll Óskar fékk nóg og kallar sig nú Hinn gaurinn

29. október 2012 09:38

Páll Óskar Hallgrímsson kallar sig hinn gaurinn í símaskránni til að aðgreina sig frá poppstjörnunni. Fréttablaðið/Stefán

Hann heitir Páll Óskar Hallgrímsson og kallar sig í símaskránni Hinn gaurinn. Þannig vill hann aðgreina sig frá popparanum og nafna sínum Páli Óskari Hjálmtýssyni.

"Kornið sem fyllti mælinn var þegar einhver strákur hringdi í mig og hélt að ég væri poppstjarnan. Hann spurði mig um ráð hvernig ætti að koma út úr skápnum. Ég held að hann hafi verið fjórtán eða fimmtán ára.

Daginn eftir breytti ég þessu," segir Páll Óskar. Þetta var fyrir um ári og eftir það hefur hann verið laus við "böggið". Fram að því hafði hann lent í frekar mörgum símaötum og var orðinn mjög þreyttur á því, eins og gefur að skilja. Spurður hvort hann sé aðdáandi Palla segir hann nafna sinn vera alveg ágætan. "En ég er samt enginn rosalegur aðdáandi."

Páll Óskar Hallgrímsson er 23 ára flugnemi. Hann kveðst einu sinni hafa hitt söngvarann. "Ég held ég hafi rekist á hann einu sinni þegar ég var lítill þegar hann gaf út nýja plötu, til að fá eiginhandaráritun eða eitthvað þannig. Ég man voða lítið eftir því."

Hann segist aldrei hafa íhugað að taka nafnið sitt úr símaskránni til að losna við símaatið. En hafa vinir hans eða skólafélagar eitthvað gert grín að honum vegna nafngiftarinnar? "Þeir gerðu það í fyrstu en síðan verða þessir brandarar gamlir mjög hratt."

Sjö sem heita Páll Óskar í þjóðskránniAlls eru það sjö sem heita Páll Óskar í þjóðskránni. Tveir þeirra eru búsettir erlendis og því eru þeir fimm hér á landi. Popparinn Páll Óskar er elstur nafnanna, eða 42 ára, en sá yngsti er 19 ára og býr í Noregi.

Ef fleiri þekktir söngvarar eru skoðaðir þá á Björgvin Halldórsson einn alnafna sem er einnig í tónlistarbransanum, í hljómsveitinni Elephant Poetry. Alls eru Bjöggarnir sjö talsins rétt eins og Pallarnir. Sá elsti er hvorki meira né minna en 100 ára gamall á meðan Bo Hall sjálfur er 61 árs. Sá yngsti er aftur á móti 18 ára.

Tvær Sigríðar Beinteinsdætur eru til. Önnur býr á Akranesi en hin, söngkonan Sigga Beinteins, í Kópavoginum. Þegar röðin kemur að popparanum Ásgeiri Trausta Einarssyni er hann sá eini hér á landi samkvæmt þjóðskránni en á hinn bóginn eru ellefu Bjarkir Guðmundsdætur skráðar.

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins