Breyta nafni á sjónvarpsþætti vegna gagnrýni ljósmyndara

„Í kjölfar umræðu um nafn sjónvarpsþáttarins „Ert þú Ljósmyndarinn?" sem sýndur verður á Skjá Einum vill Stórveldið tilkynna að eftir fund með Ljósmyndarafélagi Íslands þá höfum við tekið þá ákvörðun að breyta nafni þáttarins í Ljósmyndakeppni Íslands," þetta stendur í tilkynningu sem fjölmiðla- og veitingahúsamaðurinn Sigmar Vilhjálmsson, sendi á fjölmiðla fyrir stundu.

Þar kemur fram að framleiðslufyrirtæki þáttarins hafi tekið mið af gagnrýni Ljósmyndarafélags Íslands, en formaður þess gagnrýndi nafn þáttarins í Fréttablaðinu fyrr í vikunni. Þar stakk hann meðal annars upp á að hentugra nafn á þættinum væri „Áhugaljósmyndarinn.

Í tilkynningu frá Stórveldinu segir að ástæðan fyrir breytingunum séu einfaldar: „Þættirnir eiga að stuðla að auknum áhuga á ljósmyndun og aukinni þekkingu á faginu. Ljósmyndun er lögverndað fag og það að kalla þann Ljósmyndara sem ekki hefur til þess réttindi samræmist hvorki lögum, né heldur gildum þáttanna. Það er því okkur ljúft og skylt að breyta heiti þáttanna, enda mun nafnið ekki hafa áhrif á þættina sem slíka."

Að lokum þakkar Stórveldið Ljósmyndarafélagi Íslands fyrir góð samskipti og réttmæta athugasemd. „Með nafnabreytingunni er Stórveldið að styðja baráttu ljósmyndara fyrir lögvernd á faginu, enda er mikilvægt að standa vörð um fagmenntaðar starfsgreinar hér á landi," segir svo í tilkynningunni.

Þættirnir verða sýndir á Skjá Einum á næsta ári.