80.000 króna úlpa fyrir stjörnubarn

Fótboltaeiginkonan Coleen Rooney ákvað að spreða 419 pundum, rúmlega áttatíu þúsund krónum, í úlpu handa syni sínum Kai Rooney sem verður þriggja ára í næsta mánuði.

Úlpan er frá merkinu Moncler en Coleen á eina slíka í fullorðinsstærð sem kostar 750 pund, tæplega 150 þúsund krónur.

Eiginmaður Coleen er knattspyrnumaðurinn Wayne Rooney sem spilar með Manchester United. Þrátt fyrir það var Kai í Real Madrid-galla undir rándýru úlpunni en það er liðið sem fyrrum liðsfélagi Waynes, Cristiano Ronaldo, spilar fyrir.

Coleen og Wayne sögðu aðdáendum sínum frá því að þau ættu von á öðru barni á Twitter í síðustu viku. Nýja barnið er væntanlegt í maí á næsta ári. Coleen og Wayne gengu í það heilaga á Ítalíu árið 2008 eftir fimm ára trúlofun.