Beitir sér fyrir bættri aðstöðu á gjörgæslu

Lækni, sem sveið lélegur aðbúnaður sem ástvinum sjúklinga á gjörgæslu er boðið upp á, ákvað að gera eitthvað í málunum, skrifaði bók sem nýtist heilbrigðisstarfsfólki og lætur ágóðann renna í endurbætur á aðstöðunni.

Ingu Jónu Ingimarsdóttur, deildarlækni á lyflækningadeild, þótti aðstaða ástvina sjúklinga á gjörgæslu ekki nægilega góð og vildi bæta úr. Einnig hafði hún tekið eftir því að þörf var á útgáfu handbókar um sýklalyf.

Hún sá tækifæri til að slá tvær flugur í einu höggi, skrifaði þarft rit, svokallað Sýklalyfjaval sem auðveldar læknum að velja rétt lyf, en ágóðinn af sölu hans fer í að bæta herbergin.

„Ég var að tala við einn hjúkrunarfræðinginn um hvaða málefni við gætum styrkt. Mig langaði að styrkja eitthvað sem vanalega fær ekki pening."

Hún telur mikilvægt að herbergin séu vistleg enda fá ástvinir sjúklinga þar oft erfiðar fréttir.

Hér inni dvelur fólk oft lengi og bíður eftir ættingjum sínum?

„Já, það gerir það. Sérstaklega þegar sjúklingarnir eru afar veikir. Skiljanlega vill fólkið vera nálægt ástvinum sínum."