Hótaði lögreglumönnum á Facebook

Karlmaður á fertugsaldri var í dag sakfelldur í Héraðsdómi Reykjavíkur fyrir ærumeiðandi aðdróttanir og hótanir í garð tveggja lögreglumanna.

Maðurinn, sem einnig var sakaður um að hafa brotið gegn valdstjórninni, játaði brot sín. Hann hlaut sex mánaða skilorðsbundinn dóm.

Hótanir mannsins birtust á samskiptasíðunni Facebook 18. og 19. september á þessu ári. Ummælin vörðuðu störf tveggja lögreglumanna. Hann kallaði þá meðal annars nasista og geðsjúklinga.

Í dóminum segir að hótanirnar hafi verið til þess fallnar að vekja hjá lögreglumönnunum ótta um líf sitt, heilbrigði og velferð.

Maðurinn á langan sakaferil að baki, allt aftur til ársins 1995.