Karlar sem beita heimilisofbeldi leita sér hjálpar

Frá árinu 2006 hafa 144 karlar nýtt sér þjónustu verkefnisins Karlar til ábyrgðar og komið í stuðningsviðtöl. Viðtölin eru hugsuð fyrir karlmenn sem beita heimilisofbeldi og vilja hætta því og taka ábyrgð á eigin ofbeldishegðun. Gerendurnir geta valið um einstaklings- eða hópmeðferð.

Í ársskýrslu verkefnisins 2011 kemur fram að 32 nýir karlar hafi komið í viðtöl á árinu og 19 haldið áfram viðtalsmeðferð. Fullskipað var í hópmeðferðinni allt árið og nokkrir biðu eftir plássi. Síðasta haust fékk verkefnið viðbótarframlag frá stjórnvöldum upp á 3,2 milljónir á ári. Í kjölfarið er stefnt að því að smíða kynningarefni, efla starfsemina og fara með hana út á landsbyggðina.

Verkefnið hefur gefið góða raun, en það hófst á ný árið 2006 eftir stutt hlé. Fram hefur komið að verulegt samræmi er á milli lýsinga gerenda og þolenda á ofbeldisbeitingu í upphafi meðferðar. Misræmi er þó ákveðið, þar sem gerendur vanmeta andlega þáttinn í ofbeldinu.