Bændur geta ekki hafið heyskap vegna þurrka og kulda

Þurrkar og næturkuldi síðustu misseri valda því að bændur geta ekki hafið heyskap af alvöru nú þegar að júnímánuður fer að verða hálfnaður.

Fjallað er um málið í Bændablaðinu sem kom út í dag.

Á Austurlandi eru menn ekki einu sinni byrjaðir að slá þar sem lítil spretta hefur verið á túnunum vegna kulda og á Norðvesturlandi eru þurrkar að leika bændur grátt og eru tún farin að brenna vegna skorts á vætu. Útlitið er nú bjartast á Vesturlandi en þar er ágætis spretta og sumir bændur byrjaðir að heyja af krafti.

„Það var svo kalt á tímabili í maí og svo hefur verið lítil úrkoma. Þó svo það sé þokkalegur lofthiti núna þá hefur verið kalt á næturnar. Þetta er allt í lagi eins og er en okkur vantar vætur, sérstaklega í uppsveitum Suðurlands. Það er að verða regla að þar sé vöntun á vætu öll vor með hættu á skrælnun og bruna í túnum," segir Sveinn Sigurmundsson, framkvæmdastjóri Búnaðarsambands Suðurlands, í samtali við Bændablaðið.