Little Talks mun hertaka Bandaríkin í sumar

Bandaríska fréttablaðið Boston Herald hefur valið lagið Little Talks með íslensku hljómsveitinni Of Monsters and Men sem eitt af bestu lögum sumarsins. Little Talks er eitt af sjö lögum sem blaðið telur eiga möguleika á að verða vinsælasta lag sumarsins í Bandaríkjunum.

Þannig eru Of Monsters and Men sett í flokk með stórstjörnunum Rihönnu og Justin Bieber. Sú fyrrnefnda gaf út lagið Where have you been fyrir stuttu en lagið hefur notið gríðarlegra vinsælda.

Þá er lagið All Around the World með Justin Bieber talið líklegt til vinsælda í sumar.

Dálkahöfundur Boston Herald hefur þó tröllatrú á Little Talks. „Íslendingarnir í Of Monsters and Men virðast ætla að eiga vinsælasta lag sumarsins," skrifar Jed Gottlieb. „Ávanabindandi viðlög hljómsveitarinnar munu gera innrás í Bandaríkin að hætti víkinga forðum."

Hægt er að nálgast umfjöllun Boston Herald hér. Þá er hægt að sjá tónlistarmyndband fyrir lagið Little Talks hér fyrir ofan.