Carroll kom Liverpool í úrslitaleikinn

Andy Carroll var annan leikinn í röð hetja Liverpool er hann tryggði sínum mönnum 2-1 sigur á grannliðinu Everton í undanúrslitum ensku bikarkeppninnar.

Everton komst yfir í fyrri hálfleik með marki Nikica Jelevic en framherjarnir Luis Suarez og áðurnefndur Carroll skoruðu mörk Liverpool í seinni hálfleik.

Carroll skoraði sigurmarkið með skalla eftir aukaspyrnu aðeins fáeinum mínútum fyrir leikslok. Stuðningsmenn Liverpool fögnuðu vel og innilega en margir bláklæddir sáust fella tár í stúkunni á Wembley.

Leikurinn byrjaði fjörlega og bæði lið gerðu sig líklega til að skora. En ísinn var ekki brotinn fyrr en á 25. mínútu þegar varnarmenn Liverpool gerðu sig seka um skelfileg mistök.

Þeir Daniel Agger og Jamie Carragher hikuðu báðir við að hreinsa boltann frá marki og endaði það með því að Carragher skaut í Tim Cahill og af honum fór boltinn beint fyrir fætur Jelavic. Króatinn þakkaði kærlega fyrir sig og skoraði auðveldlega.

Liverpool sótti eftir þetta en með litlum árangri. Everton lá nokkuð til baka og beitti skyndisóknum en þeir bláu höfðu forystuna þegar flautað var til hálfleiks.

Andy Carroll fékk dauðafæri í upphafi seinni hálfleiks eftir sendingu Stewart Downing en fór illa að ráði sínu og klúðraði fyrir nánast opnu marki.

Það þurfti á endanum önnur varnarmistök til að fá annað mark í leikinn. Sylvain Distin reyndi sendingu til baka en hún var slök. Suarez komst inn í sendinguna og skoraði fram hjá Tim Howard í markinu.

Þetta gerðist þegar um hálftími var eftir af leiknum og sóttu bæði lið án þess þó að skapa sér hættuleg færi. Það er að segja þar til að Carroll skoraði sigurmarkið fjórum mínútum fyrir leikslok.

Craig Bellamy, sem hafði komið inn á sem varamaður, tók aukaspyrnu við hornfánann sem var dæmd á Seamus Coleman fyrir að brjóta á Steven Gerrard. Coleman var reyndar á gulu spjaldi og var heppinn við að sleppa við annað.

En Bellamy sendi boltann inn í teig og beint á kollinn á Carroll sem skoraði með flottum skalla í fjærhornið. Þar með breyttist hann úr skúrki í hetju á augabragði og sá til þess að Liverpool leikur til úrslita um enska bikarinn í lok næsta mánaðar, gegn annað hvort Tottenham eða Chelsea. Þau lið mætast í hinni undanúrslitaviðureigninni á morgun.