Skiptir máli að kona verði næsti biskup

Það skiptir máli að kona verði næsti biskup Íslands bæði vegna ásýndar kirkjunnar og jafnréttisstefnu. Þetta segir Agnes Sigurðardóttir prestur í Bolungarvík sem hlaut flest atkvæði í fyrri umferð biskuskjörsins í gær.

Tilkynnt var um úrslit í fyrri umferð biskupskjörsins í gær. Átta voru í framboði. Agnes Sigurðardóttir prestur í Bolungarvík hlaut flest atkvæði eða tæp 28% og Sigurður Árni Þórðarson prestur í Neskirkju næst flest atkvæði eða um 25%. Þar sem enginn hlaut meira en 50% atkvæða verður kosið á milli tveggja efstu það er þeirra Agnesar og Sigurðar Árna. Sú kosning hefst í byrjun apríl og eiga úrslit að liggja fyrir 21. apríl.

Agnest segist ekki hafa vitað hverju hún átti von á fyrir kjörið.

„Ég hef fundið fyrir miklu stuðningi en ég reyndar átti ekki von á svona miklum stuðningin en ég er auðvitað þakklát fyrir hann," segir Agnes.

„Mér fannst afar áhugavert að dreifingin skyldi ekki vera meiri. Það kom mér á óvart að það skyldu tvö vera áberandi efst, og það kom mér gleðilega á óvart að það var svona fallegur fléttulisti á körlum og konum í fjórum efstu sætunum," segir Sigurður Árni.

„ Ég stefni að því að leggja höfuðárherslu á fjölskyldutengt starf, starf í þágu barna og unglinga, því að kirkjan þarf að leggja mikla rækt við allt fjölskyldu- og heimilatengt starf," segir Sigurður Árni.

Þá vakti athygli að tvær konur skyldu verða í þremur efstu sætunum í kjörinu í gær. Agnes telur það skipta máli að kona verði næsti biskup Íslands en það yrði þá í fyrsta sinn.

„Það skiptir náttúrulega máli varðandi jafnréttisstefnuna því að það hefur samkvæmt henni þá hafa ekki markmið hennar náðst að fullu en þetta er einn liður í því að markmið hennar náist að kona verði biskup. Að því leytinu til skiptir það máli, vegna ásýndar kirkjunnar og jafnréttisstefnu þá tel ég að það skipti máli," segir Agnes.