Skora á Kristínu

Hópur fólks vinnur nú að því að undirbúa áskorun á Kristínu Ingólfsdóttur rektor Háskóla Íslands til að gefa kost á sér í embætti forseta Íslands.Tilefnið er könnun sem birtist á laugardag og sýndi að mikill meirihluti þjóðarinnar vill sjá nýjan húsbónda á Bessastöðum.

Samkvæmt upplýsingum frá Rúnu Hauksdóttur, sem tilheyrir þessum hópi, er um að ræða hóp fólks sem hefur kynnst Kristínu á hennar æviskeiði og þekkir hana af góðu einu. Þessi hópur lítur til víðtækrar og góðrar reynslu Kristínar í vandasömu hlutverki sem rektor, til þess árangurs sem skólinn hefur náð undir hennar handleiðslu og til þeirrar virðingar sem hún hefur aflað sér heima og erlendis í rektorsstarfi og sem vísindamaður á undanförnum árum.

Í tilkynningu frá hópnum segir að Kristín þyki mjög farsæll stjórnandi, föst fyrir og ákveðin en jafnframt sanngjörn og afar vinsæl af þeim sem kynnast henni. Þá kemur jafnframt fram að þessi hópur hefur áður leitað til Kristínar og hún gefið honum afsvar. Í ljósi niðurstöðu úr framangreindri skoðanakönnun undirbýr hópurinn nýja áskorun til Kristínar, sem nú er stödd erlendis. Hópurinn telur rétt að koma þessu á framfæri nú í ljósi þeirrar miklu umræðu sem skapast hefur um forsetakjörið.