"Hann hafði ofsalega mikla hæfileika"

Dóttir Sævars Ciesielskis segir föður sinn hafa skilið eftir sig gríðarstórt safn mynda sem hann málaði sjálfur. Hann hafi verið mjög hæfileikaríkur á því sviði en þær séu ekki til sölu.

Á síðasta vefuppboði hjá Gallerí Fold vakti mynd eftir Sævar Cieselski, sakborning í Guðmundar- og Geirfinnsmálinu gríðarlega athygli. Myndin var metin á 20 til 30 þúsund krónur en var að lokum slegin á 120 þúsund krónur eða fjórfalt verðmat. Kom þetta uppboðshöldurum gríðarlega á óvart en þetta var fyrsta myndin sem Gallerí Fold hefur fengið til sölu. Fréttastofa hafði samband við dóttur Sævars, Júlíu og fékk að skoða nokkrar myndir sem faðir hennar gaf henni og systkinum hennar.

„Hann hafði ofsalega mikla hæfileika sem listamaður og var greinilega í blóð borin þessi list - mjög hæfileikaríkur," sagði Júlía Marinósdóttir.

Hún segir myndirnar vera mismunandi eftir tímabilum til dæmis séu myndir frá 1977 og 78 þegar Sævar var að hefja afplánun á dómi sínum.

Myndir frá seinni tímum eins og þessi frá 2002 sem Sævar gaf Júlíu, sýna síðan mun rólegri mann.

„Ég sé bara mikla fegurð í þeim og svona ákveðin ró komin í þær rosalega fallegar myndir."

Hún segir Sævar alltaf hafa verið viðriðinn myndlist og hann hafi gefið mikið af myndum sínum. Hún hafi ekki hugsað sér að selja myndirnar sínar enda hafa þær mikið tilfinningalegt gildi.