Vegagerð innan við 10 prósent af því sem áður var

Samningar um nýframkvæmdir í vegagerð á Íslandi hafa undanfarin þrjú ár fallið niður í að vera innan við einn fimmti af því sem áður var að meðaltali og á síðasta ári voru þær innan við einn tíundi af því sem áður tíðkaðist, eða aðeins upp á 871 milljón króna, þegar meðaltalið var áður yfir 10 milljarðar króna á ári.

Vegagerðin hefur nú boðið út langstærsta verkið í fjögur ár sem er þverun tveggja fjarða á sunnanverðum Vestfjörðum. Stytta á þjóðveginn um Barðastrandarsýslur um átta kílómetra með því að leggja hann þvert yfir Kjálkafjörð og Mjóafjörð, inn af Kerlingarfirði. Vegfarendur losna við mjóan og hlykkjóttan 24 kílómetra malarveg en fá í staðinn 16 kílómetra beinan og breiðan malbiksveg. Verkið á að vinnast á næstu þremur árum og áætlað er að það muni kosta um þrjá milljarða króna.

Fara þarf aftur til ársins 2008 til að finna dæmi um svo stór verk, að sögn Hreins Haraldssonar vegamálastjóra, en það ár voru Bolungarvíkurgöng og Vopnafjarðarleið boðin út.

Tölur Vegagerðarinnar um samningsfjárhæðir nýframkvæmda í vegagerð undanfarinn áratug, sem birtust á súluriti í fréttum Stöðvar 2 í kvöld, sýna vel ördeyðuna á þessu sviði undanfarin þrjú ár en tölurnar eru á meðalverðlagi ársins 2011. Heildarsamningar hvers árs sveifluðust frá rúmlega fimm milljörðum árið 2002 og fóru yfir sautján milljarða árið 2006, en árið 2009 fór talan niður í 2,9 milljarða, 1,9 milljarða árið 2010 og svo niður í 871 milljón króna á síðasta ári.

Ef við drögum saman súlurnar, annars vegar í meðaltal áranna 2002 til 2008, og hins vegar í meðaltal áranna 2009 til 2011, sést að samningar um nýframkvæmdir fóru að jafnaði yfir tíu milljarða króna á ári á fyrra tímabilinu en hafa fallið niður í 1,9 milljarða króna síðustu þrjú árin, eða innan við einn fimmta af því sem áður var.