Keflavíkurflugvöllur veitti bestu þjónustuna

Keflavíkurflugvöllur veitti besta þjónustu evrópskra flugvalla með undir 2 milljónum farþega á ári að mati þátttakenda í könnun alþjóðasamtaka flugvalla, Airports Council International. Í tilkynningu frá Isavia segir að flugvöllurinn hafi raunar fengið flest heildarstig allra evrópskra flugvalla líkt og árið 2009 en taldist nú í nýjum flokki smærri flugvalla sem ekki koma til álita í fyrsta sæti allra flugvalla.

„Þjónustukönnunin er framkvæmd á 186 helstu flugvöllum heims, þar af 54 í Evrópu og svara farþegar spurningum um gæði 36 þjónustuþátta. Niðurstöður eru birtar ársfjórðungslega og heildarárangur árlega. Keflavíkurflugvöllur hefur jafnan verið í efstu sætum evrópskra flugvalla frá því að hann hóf þátttöku í könnuninni árið 2004. Hann var valinn besti flugvöllur Evrópu árið 2009 og var í öðru sæti árið 2010 ásamt því að vera í þriðja sæti á heimsvísu árið 2004 í flokki flugvalla með undir fimm milljónir farþega á ári," segir ennfremur.

Þá segir að Keflavíkurflugvöllur skari jafnan framúr í heildaránægju farþega, kurteisi og hjálpsemi starfsfólks, auðveldu tengiflugi, notalegu andrúmslofti, hreinlæti og biðtíma í öryggisleit. „Einnig eru farþegar mjög ánægðir með skjóta afgreiðslu farangurs, aðgengi að farangurskerrum, bankaþjónustu og veitingastaði í flugstöðinni. Möltuflugvöllur var valinn besti evrópski flugvöllurinn með yfir 2 milljónir farþega en Incheonflugvöllur í Suður Kóreu bestur á heimsvísu."

Björn Óli Hauksson forstjóri Isavia, sem annast rekstur vallarins segir að þar á bæ séu menn stoltir af þessum glæsilega árangri sem staðfestii að starfsfólk Keflavíkurflugvallar sé fagfólk á heimsmælikvarða. „Þjónustukönnun ACI er mikilvægt verkfæri til þess að meta gæði einstakra þjónustuþátta og frammistöðu við að mæta þörfum viðskiptavina. Ég óska öllu starfsfólki á Keflavíkurflugvelli til hamingju með þennan glæsilega árangur", segir Björn Óli Hauksson forstjóri Isavia sem annast rekstur Keflavíkurflugvallar."

„Þjónusta við flugfarþega á Keflavíkurflugvelli nær til allra flugvallarstarfsmanna. Fagmennska og samstillt átak þeirra tryggir að afgreiðsla verði ávallt með skjótum og öruggum hætti. Forráðamenn Keflavíkurflugvallar og rekstraraðila fagna þessum frábæra árangri og þakka starfsmönnum glæsilega frammistöðu."