Þingmenn og stjórnlagaráð ráða ráðum sínum

Stjórnlagaráð verður kallað aftur saman í mars og þjóðaratkvæðagreiðsla um nýja stjórnarskrá fer fram í júní ef tillaga meirihluta stjórnskipunar- og eftirlitsnefndar Alþingis nær fram að ganga.

Nefndin kemur saman í dag og búist er við að þar verði tillaga meirihlutans verði samþykkt. Róbert Marshall er varaformaður stjórnskipunar- og eftirlitsnefndar Alþingis.

„Í tillögunni er gert ráð fyrir því að stjórnlagaráð verði kallað aftur saman til fjögurra daga fundar í byrjun mars þar sem ráðið mun fara hugmyndir að breytingum og hugsanlegar orðalagsbreytingum á þeirra tillögu að stjórnarskrá. Svo við getum undirbúið í kjölfarið spurningar sem að við myndum setja fram í ráðgefnandi þjóðaratkvæðagreiðslu sem að fram færi í júní samhliða forsetakosningum," segir Róbert.

Róbert segir engar breytingar hafa verið gerðar á tillögum ráðsins.

„Það eru kannski svona spurningar sem að við myndum vilja að stjórnlagaráð myndi fjalla um. Eins og til dæmis varðandi fyrirkomulag kosninga, hlutverk forsetans, um ríki og kirkju og svo framvegis. Við erum að gera ráð fyrir að þetta sé bara liður í vinnunni. Þjóðaratkvæðagreiðslan sem að fram fer svo í júní sé jafnframt bara efnislega aðkoma þjóðarinnar að málinu sem að síðan heldur áfram í haust og þá gerum við ráð fyrir að hefja lokakafla þessarar vinnu. Þannig að í enda næsta vetrar verðum við tilbúin með frumvarp að nýrri stjórnarskrá sem að við getum þá vonandi samþykkt hér á þinginu fyrir kosningar það ár," sagði Róbert Marshall.