Vill koma til móts við þá sem tóku verðtryggð lán

Munurinn á þeim sem tók verðtryggð íslensk lán - og hinum sem tóku gengislán er orðinn hrópandi, segir Helgi Hjörvar, formaður efnahags- og viðskiptanefndar Alþingis.

Hann segir óhjákvæmilegt að koma til móts við fólk sem keypti í eignabólunni og situr uppi með verðbólguskot á lánum sínum og minni kaupmátt. Efnahags- og viðskiptanefnd hefur að undanförnu farið yfir það hvernig megi draga úr vægi verðtryggingar í framtíðinni.

Að sögn Helga Hjörvars, formanns nefndarinnar verður það skoðað hvort og hvernig það megi koma til móts við þá sem eru með verðtryggð lán, í ljósi niðurstöðu Hæstarréttar varðandi gengislánin.

„Það er ljóst að það verður að koma til móts við fólkið sem varð fyrir þremur áföllum í senn. Þau keyptu þegar fasteignaverðið var hátt, svo kom verðbólguskot í kjölfarið og svo tók hópurinn á sig kaupmáttarskerðingu í beinu framhaldi," segir Helgi og bætir við að munurinn á hópunum, eftir ívilnanir sem lántakendur gengistryggðra lána hafa fengið, sé hrópandi.

Helgi segist ekki viss með hvaða hætti það yrði komið til móts við þá sem tóku verðtryggð lán. Það þurfi að skoða vel.

Upplýsingafulltrúi umboðsmanns skuldara, Svanborg Sigmarsdóttir, sagði svo í hádegisfréttum að niðurstaða Hæstaréttar breytti miklu. „Þetta gæti haft áhrif á þá sem eru með samninga að því leiti að skuldastaðan gæti minnkað," sagði Svanborg.