Sakar Ögmund um vanþekkingu

Gísli Marteinn Baldursson, borgarfulltrúi Sjálfstæðisflokksins, gagnrýnir Ögmund Jónasson, innanríkisráðherra, fyrir ummæli sín um að hið opinbera hafi eignarhald á flugvallarsvæðinu í Vatnsmýrinni.

Gísli Marteinn segir að Ögmundur hafi komið upp um „makalausa vanþekkingu" með því að segja að ríkið ætti landsvæði Reykjavíkurflugvallar.

Rætt var um innanlandsflugið á Alþingi í gær. Þar sagði Ögmundur að Reykjavíkurborg hefði skipulagsvald yfir flugvallarsvæðinu í Reykjavík á meðan eignarhaldið lægi hjá ríkinu.

Á vefsíðu sinni bendir Gísli Marteinn á að Vatnsmýrin sé rúmlega 150 hektarar og að ríkið eigi 63 hektara af því svæði.

„Það var þess vegnar mikilvægt að innanríkisráðherra viðurkenndi með afgerandi hætti skipulagsrétt Reykjavíkur í Vatnsmýrinni, þótt hann hafi að vísu í sömu setningu komið upp um vanþekkingu sína á skipulagsmálum borgarinnar," skrifar Gísli Marteinn á vefsíðu sinni.

„Ég hef skilið það svo að ríkið eigi landið að megin uppistöðu til," sagði Ögmundur í samtali við Vísi. „Hér stendur orð gegn orði og við skulum fá úr því skorið hjá þeim sem vita betur hvar eignarhaldið liggur."