Misvægi í verðtryggðum eignum og skuldum Landsbankans gerir það að verkum að bankinn hagnast um meira en milljarð í hvert skipti sem verðlag hækkar um prósent. Misvægið hefur aukist í Landsbankanum frá hruni, meðan hinir tveir hafa dregið úr því.

Verðtryggingarjöfnuður er orð sem notað er til að lýsa muninum á verðtryggðum eignum og skuldum, það er, hvort fjármálastofnun hefur lánað meira verðtryggt út en hún hefur sjálf fengið lánað.

Nokkuð misvægi er í verðtryggðum eignum og skuldum bankanna þriggja. Arion banki átti rúmum 14 milljörðum meira verðtryggt en hann skuldaði þegar árshlutauppgjör fyrir fyrstu 9 mánuði síðasta árs var birt, á sama tíma og munurinn nam 16 og hálfum milljarði hjá Íslandsbanka.

Langmesta ójafnvægið var í bókum ríkisbankans Landsbankans, þar sem bankinn átti hundrað og ellefu milljörðum meira verðtryggt, en hann skuldaði. Það merkir að að eitt prósent hækkun verðlags eykur hreinan hagnað bankans um meira en 1,1 milljarð króna af því að verðmæti eigna hans eykst meira en skuldirnar - það meira en þrefalt á við hina bankana til samans.

Sé þróunin skoðuð frá ársbyrjun 2009 sést að hinum bönkunum hefur báðum tekist að draga úr ójafnvæginu, Íslandsbanka þó betur, á meðan ójafnvægið hefur aukist mikið á sama tíma hjá Landsbankanum.

Hætta er á að ójafnvægið aukist enn, þar sem bankinn mun að öllum líkindum breyta gengistryggðum lánum í verðtryggð og auka útlánin frekar.

Upplýsingafulltrúi Landsbankans segir í samtali við fréttastofu að bankinn sé meðvitaður um þetta misvægi og verið sé að reyna að vinda ofan af því. Verðtryggðu lánin vindi hins vegar upp á sig, og lítill áhugi virðist á verðtryggðum innlánum til að vega upp á móti því.

Hann segir að bankinn sé ekki meðvitað að taka stöðu með verðbólgunni, og telur að hinum bönkunum hafi tekist betur að draga úr sinni stöðu því efnahagsreikningur þeirra sé minni.