Landhelgisgæslan fær nýja þyrlu

Búið er að undirrita leigusamning til 12 mánaða um leigu á þyrlu fyrir Landhelgisgæsluna. Þyrlan er af gerðinni Super Puma eða sömu tegundar og TF LÍF og TF GNÁ.

Verið er að leggja lokahönd á skoðun og skráningu þyrlunnar og er gert ráð fyrir að henni verði flogið til Íslands í lok næstu viku. Mun þyrlan fá einkennisstafina TF SÝN.

Í tilkynningu segir að með þessum hætti er tryggt að tvær þyrlur verði í rekstri næstu vikurnar á meðan TF LÍF er í viðamikilli skoðun í Noregi. Stærstan hluta ársins verða síðan þrjár þyrlur í rekstri sem eykur möguleika Landhelgisgæslunnar á að skipuleggja viðhald og skoðanir á þyrlunum þannig að ávallt séu tvær þyrlur til taks eins og nauðsynlegt er og stefnt hefur verið að.

Því er undirritun leigusamnings mjög stór áfangi fyrir Landhelgisgæsluna og alla þá sem þurfa að reiða sig á aðstoð, sjúkraflutninga og björgun með þyrlum.