Birgitta: Svartur dagur í sögu lýðræðisins

„Svartur dagur í sögu lýðræðis okkar," sagði Birgitta Jónsdóttir, þingmaður Hreyfingarinnar, á fésbókarsíðu sinni strax að lokinni atkvæðagreiðslu á Alþingi í gær. Þar var felld tillaga um að vísa frá tillögu Bjarna Benediktssonar um að draga málshöfðun gegn Geir Haarde, fyrrverandi forsætisráðherra, til baka.

Birgitta segir ekki líklegt að gærdagurinn hafi aukið virðingu almennings gagnvart þeim sem lofuðu að gæta almannahagsmuna en ekki sinna eigin sérhagsmuna fyrir kosningar 2009.

Tillagan var felld með 31 atkvæði gegn 29. Þrír greiddu ekki atkvæði. VG, Samfylkingin og Framsóknarflokkurinn klofnaði í afstöðu sinni. Sjálfstæðismenn greiddu allir atkvæði gegn tillögunni og Hreyfingin greiddi öll atkvæði með henni.