Finnst koma til greina að Ögmundur víki úr ríkisstjórn

Álfheiður Ingadóttir, þingmaður VG, segir að sér finnist koma til greina að Ögmundur Jónasson láti af embætti ráðherra vegna afstöðu sinnar í atkvæðagreiðslu um frávísunartillögu á tillögu Bjarna Benediktssonar um að láta málshöfðun gegn Geir Haarde forsætisráðherra niður falla. Í Sprengisandi á Bylgjunni í dag sagði Álfheiður að Ögmundur sæti á ráðherrastól í umboði þingflokks VG, að tillögu formanns flokksins. Hún réði því ekki ein hvort hann sæti áfram.

En þegar gengið var á hana með hennar eigin afstöðu um hvort til greina kæmi að Ögmundur myndi víkja sagði hún: „Já já, mér finnst það". Álfheiður segir það vera sína skoðun að dómsmálaráðherra hefði ekki átt að tjá sig um málið opinberlega, en það hefði að sjálfsögðu verið eðlilegt af honum að greiða atkvæði í þinginu.

Álfheiður segir að ríkisstjórnin sé ekki að springa. „Hún er ekkert meira sprungin í dag en hún var í gær. Þessi ríkisstjórn hefur að mínu áliti verið nokkurskonar minnihlutastjórn í nokkurn tíma. Og það er ekkert slæm staða í mínum huga," segir Álfheiður.