Flensan að gera vart við sig

Árleg inflúensa virðist vera að ná sér á strik en sóttvarnarlæknir segir sífellt stærra hlutfall þeirra sem leita til læknis hafa fundið fyrir einkennum flensunnar.

Síðustu áratugi hefur inflúensa gengið yfir landið á hverjum vetri. Um er að ræða veirusýkingu sem veldur faraldri. Henni fylgir oft hár hiti, beinverkir og kvef. Flensunnar verður yfirleitt var yfir háveturinn eða frá því í október þar til í mars. Í ár er hún nokkuð seint á ferðinni. Haraldur Briem sóttvarnarlæknir telur að flensan sé fyrst að ná sér á skrið núna. „Við fáum tilkynningar um þetta og maður sér að stærra og stærra hlutfall þeirra sem leita til læknis eru einmitt með inflúensulílk einkenni," segir Haraldur.

Hann telur að inflúensutilfellum muni fjölga á næstunni. „Hún ætti að gera það núna þegar líður á mánuðinn þennan og í febrúar," segir hann. Haraldur segir erfitt að segja hversu útbreidd hún verður. „Þetta er nú háð líka hvað menn hafa verið duglegir að bólusetja en þetta getur verið 5-10% af þjóðinni sem getur fengið svona árstíðarbundna inflúenslu," segir hann.

Þá segir hann ýmis ráð til gegn flensunni. „Menn eiga að fara vel með sig og ef þeir eru með þessi einkenni að halda sig heima þá til að vera ekki að smita aðra. Líka að reyna að gæta þess að vera ekki að hósta framan í fólk og halda fyrir vitin og þvo sér vel um hendurnar. Þetta er þetta hefðbundna sem við segjum allta," sagði Haraldur Briem.