Gagnrýnir markaðssetningu á nýjum gosdrykk

Gosdrykkur sem er nýkominn á íslenskan markað er sagður auka brennslu líkamans svo um munar. Fullyrðingin á ekki við rök að styðjast að mati næringarfræðings sem telur slík fyrirheit geta verið neytendum skaðleg.

Drykkurinn Aspire hefur örugglega selst ágætlega að undanförnu því framleiðandinn fullyrðir að ein svona dós auki brennslu líkamans um tvöhundruð kaloríur. Fréttastofa hefur rætt við þónokkra næringarfræðinga og aðra sérfræðinga sem eru sammála um að hér sé gylliboð á ferðinni.

Fríða Rún Þórðardóttir næringarfræðingur segir það vera koffínið sem þeir séu að gefa í skyn að auki þessa brennslu og koffín hafi vissulega örvandi áhrif á líkamann. Koffín í þessu magni geti samt ekki aukið áhrifin að því marki sem talað sé um.

Til að styðja við mál sitt vísar framleiðandinn í rannsókn, en þar er galli á gjöf Njarðar. Framkvæmd hennar er langt frá því að vera fullkomin. Þátttakendur voru einungis tuttugu talsins og rannsóknin hefur aldrei verið endurtekin. Þá er drykkurinn sagður virka einna best þegar hans er neytt áður eða á meðan æfingu stendur.