Íslendingar taka sig á í mataræðinu

Niðurstöður landskönnunar á mataræði landsmanna 2010-2011 benda til þess að mataræði mataræði Íslendinga hefur þokast nær ráðleggingum um heilsusamlegt mataræði frá árinu 2002.

Greint var frá niðurstöðunum í dag og í tilkynningu frá Landlækni kemur fram að neysla á harðri fitu og viðbættum sykri hefur heldur minnkað. Þá borða landsmenn meira af grænmeti, ávöxtum og grófu brauði og fleiri taka lýsi. „Enn er þó langt í land með að þorri þjóðarinnar fylgi ráðleggingum um a.m.k. 400 grömm af ávöxtum og grænmeti daglega eða daglega neyslu grófra brauða og D-vítamíns/lýsis," segir ennfremur.

Að könnuninni stóðu Embætti landlæknis, Matvælastofnun og Rannsóknastofa í næringarfræði við Háskóla Íslands og Landspítala háskólasjúkrahús og náði hún til fólks á aldrinum 18-80 ára. Hliðstæð rannsókn fór síðast fram árið 2002.