Segir gagnrýni byggða á misskilningi

Ásta Ragnheiður Jóhannesdóttir, forseti Alþingis, segir að gagnrýni flokkssystkina á ákvarðanir hennar í Landsdómsmálinu byggi á misskilningi. Að minnsta kosti fimm stjórnarþingmenn vilja að hún víki sæti sem forseti Alþingis.

Þingflokkur samfylkingarinnar klofnaði í atkvæðagreiðslu í Landsdómsmálinu á föstudag. Fjórtán greiddu atkvæði með frávísunartillögu Magnúsar Orra Schram en fjórir greiddu hins vegar atkvæði gegn tillögunni.

Þingflokkurinn kom saman til fundar hér í húsakynnum Samfylkingarinnar í Kópavogi í dag en mikil ólga er innan flokksins eftir atkvæðagreiðsluna á föstudag.

Heimkoma Össurar Skarphéðinssonar, utanríkisráðherra, frá útlöndum á föstudag kom þannig nokkrum þingmönnum Samfylkingarinnar í opna skjöldu en Össur greiddi atkvæði gegn frávísunartillögunni. Össur sendi hins vegar tölvupóst fyrir brottför þar sem hann lét vita að hann gæti verið kominn heim á föstudag en skilaboðin virðast ekki hafa skilað sér til allra þingmanna flokksins.

Þá hefur Ásta Ragnheiður Jóhannesdóttir, forseti Alþingis, sem einnig greiddi atkvæði gegn tillögunni verið harðlega gagnrýnd fyrir setja Landsdómsmálið á dagskrá. Ungliðahreyfing Samfylkingarinnar hefur lýst yfir vantrausti á Ástu vegna málsins og þá ætla að minnsta kosti fimm stjórnarþingmenn að styðja tillögu um Ásta víki þar á meðal Mörður Árnason, þingmaður Samfylkingarinnar. Ásta segist hins vegar hafa farið að lögum í málinu.

„Ég lét kanna það vel og fékk minnisblað frá yfirlögfræðingi Alþingis um að málið væri þinglegt," segir Ásta Ragnheiður sem telur að gagnrýnin byggi á mörgu leyti á misskilningi.