Enginn vildi hitta þingmenn Norðurlandaráðs

Engin beiðni barst frá íslenskum samtökum eða almenningi um að eiga fund með þingmönnum Norðurlandaráðs fyrir fund ráðsins sem hefst í Osló í Noregi í dag. Almenningi og samtökum á Norðurlöndum var boðið að hitta þingmenn til að leggja áherslu á ákveðin málefni og kynna skoðanir sínar.

Alls bárust fjórar beiðnir, flestar frá Noregi, en þær snúa meðal annars að samgöngum milli Noregs og Svíþjóðar og ríkisborgararétti á Norðurlöndum. Þetta er í fyrsta skipti sem almenningi gefst kostur á að funda formlega með þingmönnum ráðsins en markmiðið er meðal annars að efla og opna stjórnmálaumræðuna innan ráðsins.

Tina Bostrup, starfsmaður Norðurlandaráðs, sagðist í samtali við Vísi vonast til þess að Íslendingar sýni þessu meiri áhuga þegar ráðið fundar hér á landi í lok marsmánaðar.