Eina leiðin að mynda meirihluta með sjálfstæðismönnum

Eina leiðin til að mynda meirihluta í Kópavogi í ljósi þeirrar stöðu sem upp er komin er að Samfylkingin og Vinstri grænir nái samkomulagi við sjálfstæðismenn. Þetta segir oddviti Samfylkingarinnar í Kópavogsbæ.

Viðræður Næst besta flokksins, Lista Kópavogsbúa og sjálfstæðismanna í Kópavogsbæ slitnuðu í gær. Bæjarfulltrúar bæði Næst besta flokksins og Lista Kópavogsbúa vilja ekki mynda meirihluta, heldur vilja ná samkomulagi um samstarf allra flokka í bæjarstjórn. Hjálmar Hjálmarsson lagði fram tillögu þess efnis á fundi bæjarstjórnar sem hófst kl. fimm síðdegis í dag. „Í stað núverandi fyrirkomulags, svokallaðs meirihluta/minnihlutasamstarfs, verði komið á samvinnu fulltrúa allra framboða sem eiga kjörinn fulltrúa í bæjarstjórn um starfshætti allra nefnda og ráða sem heyra undir bæjarstjórn," segir í tillögu Hjálmars.

Fulltrúar stærri flokkanna telja þetta ekki ganga upp og nauðsynlegt sé að ná samkomulagi um meirihluta.

Enginn starfhæfur meirihluti

Í raun er enginn starfhæfur meirihluti hjá bænum og þá hefur formlegri uppsögn Guðrúnar Pálsdóttur, bæjarstjóra, verið frestað, en leggja átti fram uppsagnarbréf hennar í bæjarráði í síðustu viku.

Guðríður Arnardóttir, formaður bæjarráðs og oddviti Samfylkingarinnar í bæjarstjórn Kópavogs, sagði í samtali við fréttastofu í dag eini raunhæfi meirihlutinn í ljósi þeirrar stöðu sem upp er komin væri samstarf Vinstri grænna, Samfylkingarinnar og Sjálfstæðisflokksins en hún og Ármann Kr. Ólafsson oddviti sjálfstæðismanna hafa bæði látið hafa eftir sér að „langur vegur" sé á milli flokkanna í stefnumálum.

Hafa rætt saman

Guðríður sagði engar formlegar viðræður hafnar milli flokkanna en sagðist eiga von á að þær hæfust innan tíðar. Ármann Kr. sagði það sama, engar viðræður væru hafnar, en oddvitarnir hefðu rætt saman. Ármann að staðan væri þröng og sjálfstæðismenn útilokuðu ekki samstarf við neinn flokk.

„Vissulega þótti mér áhugavert að lesa í Morgunblaðinu í morgun hvernig Samfylkingin bauð okkur upp í dans," segir Ármann, en í blaðinu í dag var haft eftir einum fundarmanni á fundi Samfylkingarinnar í Kópavogi gær að honum „hryllti við" samstarfi við sjálfstæðismenn. Ármann segir að bakland þeirra flokka sem standi að meirihluta þurfi að vera sátt við það samstarf sem verður myndað í Kópavogi. Ekki sé hægt að mynda meirihluta ef það gengur í berhögg við vilja almennra sjálfstæðismanna í bænum.

Verður erfitt að sannfæra sjálfstæðismenn um samstarf við VG og Samfylkingu ? „Við skulum segja að þetta sem haft var eftir flokksmönnum Samfylkingarinnar geri þetta ekki auðveldara," segir Ármann Kr. thorbjorn@365.is