Fasteignagjöld hesthúsa hærri en á híbýlum manna

„Kostnaður við hestahald hefur stóraukist á síðustu árum og eitt sem hestamenn eru hvað ósáttastir við er að sveitarfélögin hafi sett hesthúsin í flokk með iðnaðarhúsnæðum og því þarf að borga svívirðilega há fasteignagjöld af hesthúsunum," segir Haraldur Þórarinsson, formaður Landsambands hestamanna, sem ræddi við félagana í Reykjavík síðdegis á Bylgjunni í dag.

Þar benti hann á að hestamenn eru að sligast undan fasteignagjöldum hesthúsanna sem eru margfalt hærri en venjuleg fasteignagjöld. „Þegar hesthúsin eru komin inn í þéttbýlin þá nýta sveitarfélögin tekjustofna sína og setja hesthúsin í sérflokk," segir Haraldur sem bendir á að samband sveitarfélaga hefur samúð með stöðu hestamanna. Það gerðir ríkið líka.

„En það virðist enginn geta höggvið á hnútinn," segir Haraldur. Hann bendir á að sveitarfélögin hafi heimild til þess að hækka gjöld á húsnæði hestamanna í þéttbýli. „En manni finnst það kaldranalegt," segir Haraldur. Hægt er að hlusta á fróðlegt viðtal við Harald í Reykjavík síðdegis hér.