Betra að bæjarstórinn sé pólitískur

Meirihluti bæjarstjórnarinnar í Kópavogi er einhuga um brotthvarf Guðrúnar Pálsdóttur úr stóli bæjarstjóra í Kópavogi, segir Guðríður Arnardóttir, oddviti Samfylkingarinnar. Rætt var við Guðrúnu um starfslok hennar á föstudaginn.

Aðspurð segir Guðríður ekkert liggja fyrir um næsta bæjarstjóra. „Það liggur alveg fyrir og hefur legið fyrir lengi að það er okkar skoðun að pólitískur bæjarstjóri sé betri kostur en ópólitískur," segir Guðríður og bætir við að ýmsar forsendur liggi að baki þessari skoðun, sem Vinstri grænir séu raunar sammála Samfylkingunni um. „Ef bæjarstjórinn er pólitískur er ekkert óeðlilegt við að það sé forystumaður í stærsta flokknum," segir Guðríður ennfremur, þegar hún er spurð að því hvort hún muni hugsanlega taka við bæjarstjórastólnum. Hún segir þó að þetta sé ekki ófrávíkjanleg krafa af hálfu Samfylkingarinnar.

Guðríður segir fréttir þess efnis að til standi að taka Framsóknarflokkinn inn í meirihlutasamstarfið ekki eiga við rök að styðjast. „Við höfum bara lagt á það mikla áherslu að þessi meirihluti starfi óbreyttur út kjörtímabilið," segir Guðríður. Markmiðið sé að koma til framkvæmda þeim verkefnum sem flokkarnir sameinuðust um að vinna að eftir síðustu kosningar. „Við erum tilbúin að leggja mikið á okkur svo að svo verði," segir Guðríður.