Steingrímur heldur fast í sitt sæti

Þótt Steingrímur J. Sigfússon hafi látið af embætti fjármálaráðherra um áramótin situr hann enn í stóli sem fjármálaráðherra situr vanalegast í við þingfundi. Það er sætið sem er næst þingforseta til vinstrihandar.

Helgi Bernódusson, skrifstofustjóri Alþingis, segir að upp úr 1970-1971 hafi skapast sú venja að forsætisráðherra sæti næst forseta Alþingis til hægri handar og utanríkisráðherra næst forsætisráðherra. Hinum megin við forseta Alþingis sæti svo venjulega fjármálaráðherra. Á þessu væru þó undantekningar.

„Til dæmis þegar Þorsteinn Pálsson tók árið 1985 við embætti fjármálaráðherra af Albert, þá sat hann nú yst eins og Oddný núna. Þannig að þetta er ekkert föst venja," segir Helgi. Þegar Geir Haarde myndaði ríkisstjórn 2006 lét hann Jón Sigurðsson sitja við hliðina á sér en ekki utanríkisráðherra. Það var vegna þess að hann vildi hafa formann hins stjórnarflokksins með sér.

Helgi segir að forsætisráðherra ráði sætaskipan ráðherra í þingsal og oftast sé fylgt sömu skipan og er við ríkisstjórnarborðið.