Bæjarstjórastarfið ekki auglýst - bæjarstjórinn verður ópólitískur

Næsti bæjarstjóri Kópavogs verður ópólitískur líkt og sá sem nú situr. Meirihlutinn ætlar að standa sameiginlega að valinu en starfið verður að öllum líkindum ekki auglýst.

Enn er óljóst hver tekur við starfi Guðrúnar Pálsdóttur bæjarstjóra í Kópavogi en ljóst er að sá hinn sami á ekki eftir að koma úr röðum kjörinna fulltrúa.

„Við erum búin að ræða þetta í okkar hópi, bæði í dag og í gær og auðvitað lögðum við af stað í þessa vegferð á þessu kjörtímabili þar sem samið var um ópólitískan bæjarstjóra og við höldum því samkomulagi út kjörtímabilið," segir Guðríður Arnardóttir, formaður bæjarráðs Kópavogs.

Samkvæmt heimildum fréttastofu voru nokkur átök á fundinum í gær en Næst Besti Flokkurinn setti sig upp á móti því að Guðríður tæki við starfinu. Fallist var á málamiðlunartillögu um að meirihlutinn stæði sameiginlega að vali á næsta bæjarstjóra en starfið verður að öllum líkindum ekki auglýst. Meirihlutinn leitar því nú að hæfum og áhugasömum einstaklingum.

Guðrún er enn starfandi bæjarstjóri og mun gegna starfinu þar til ákvörðun verður tekin um starfslok hennar í bæjarstjórn, en henni var tilkynnt um uppsögn síðastliðinn föstudag.

„Við ætlum okkur ekki að greina frekar frá því samtali fyrr en við erum búin að funda með bæjarstjóra," segir Guðríður.

Samkvæmt heimildum fréttastofu verður uppsagnarbréfið lagt fram í bæjarráði á fimmtudag. Meirihluti bæjarstjórnar fundaði um framtíð bæjarstjórans síðastliðinn fimmtudaginn þar fram kom að Guðrún nyti ekki lengur trausts til að gegna embættinu.

„Ég ætla ekki að fullyrða að það hafi orðið einhver trúnaðarbrestur. Þessi mál og hvað varðar hennar stöðu, þau verða ekki rædd í dag."

Guðríður segist ekki geta fullyrt hvort að nýr bæjarstjóri taki strax við þegar Guðrún lætur af störfum.

„Það sem skiptir máli er að hér er meirihluti að störfum sem stendur traustum fótum og hann mun gera það út þetta kjörtímabil."