Síðastur þingmanna Konungsríkisins Íslands til að kveðja

Síðasti alþingismaðurinn sem heyrði undir Danakonung og tók þátt í lýðveldisstofnunni árið 1944 var kvaddur á Alþingi í dag þegar þingheimur minntist Sigurðar Bjarnasonar frá Vigur.

Sigurður Bjarnason var fyrst kjörinn á þing árið 1942 þegar landið var Konungsríkið Ísland og heyrði að forminu til undir Danakonung og hann er jafnframt síðastur alþingismanna sem kveður úr þeim hópi sem sátu á Alþingi þegar Lýðveldið var stofnað á Þingvöllum árið 1944.

Hann var ritstjóri Morgunblaðsins í 23 ár og sendiherra í 15 ár, og sem slíkur fylgdi hann handritunum heim frá Danmörku árið 1971 og var fyrsti sendiherra Íslands í Kína. Eftirlifandi eiginkona hans er Ólöf Pálsdóttir myndhöggvari.

Ásta Ragnheiður Jóhannesdóttir, forseti Alþingis, sagði í minningarorðum í dag að langt væri um liðið síðan sá öldungur, sem hér væri kvaddur, hvarf af Alþingi. Sigurður Bjarnason frá Vigur hefði gegnt forsetastörfum í þessum sal, sem forseti neðri deildar, í samtals 17 ár og hefði aðeins einn alþingismaður skipað það sæti sem hún talaði frá lengur en hann.

Sigurður var 96 ára að aldri þegar hann lést þann 5. janúar síðastliðinn og fer útför hans fram frá Dómkirkjunni næstkomandi mánudag.