Bæjarráðið fundar um uppsögn

Boðað hefur verið til aukafundar í bæjarráði í Kópavogi í dag klukkan fimm. Fundurinn er haldinn að beiðni sjálfstæðismanna, sem eru í minnihluta bæjarstjórnar.

Á fundinum stendur til að ræða uppsögn Guðrúnar Pálsdóttur bæjarstjóra. Ármann Kr. Ólafsson, oddviti sjálfstæðismanna, segir nauðsynlegt að halda fundinn til þess að bæjarfulltrúar minnihlutans fái svör við ýmsum spurningum sem upp hafi komið eftir þá „dæmalausu stjórnsýslu sem viðhöfð hefur verið af meirihlutanum undanfarinn sólarhring", eins og hann orðar það.

Ármann segir ekkert hafa komið fram í fréttum sem réttlætir uppsögn bæjarstjórans sem ráðinn var, á faglegum forsendum, af meirihlutanum fyrir einu og hálfu ári síðan. Bæjarfulltrúar og bæjarbúar eigi heimtingu á að vita hvað varð til þess að bæjarstjóranum var sagt upp störfum.