Húsmóðirin í Breiðagerði: Ég get ekki talað núna

Það varð fátt um svör þegar Vísir reyndi að ná tali af Önnu Lilju Valgeirsdóttur, íbúa í Breiðagerði 7, þar sem lögreglan aðstoðaði fulltrúa sýslumanns við að bera fólk út í morgun. „Ég get eiginlega ekki talað núna. Allt í lagi bless," sagði hún í samtali við blaðamenn.

Eins og fréttastofa Stöðvar 2 og Vísis greindi frá í dag kom um 20 manna hópur frá Heimavarnarliðinu saman í dag í húsinu að Breiðagerði þegar til stóð að bera eigandann út. Fólkið kom sér fyrir inni í stofu þegar fulltrúar sýslumannsins og lögreglan mættu. Til nokkurra átaka kom og voru tveir handteknir að sögn heimildarmanna fréttastofu.

Sama mál komst í hámæli í ágúst síðastliðnum þegar hópur fólks kom eigandanum til hjálpar og varnaði fulltrúum sýslumanns inngöngu í húsið. Þá náðist sátt í málinu og var því frestað. Nú hefur eigandinn hinsvegar endanlega verið borinn út.

Hér má sjá myndir sem Pjetur Sigurðsson ljósmyndari tók af vettvangi.