Meirihlutinn í Kópavogi fallinn - Hjálmar vill ekki Guðrúnu burt

„Það var þannig að Hjálmar studdi ekki þessa ákvörðun um brottrekstur meirihlutans," segir Ármann Kr. Ólafsson, oddviti Sjálfstæðisflokksins í bæjarstjórn Kópavogs. Haft er eftir Hjálmari á vef Ríkisútvarpsins að samstarfi hans við meirihlutann í bænum sé lokið. Það þýðir að meirihlutinn er fallinn í Kópavogi, en með Hjálmari hafði hann eins manns meirihluta.

Boðað var til aukafundar í bæjarráði Kópavogs í dag en fundurinn var haldinn að beiðni sjálfstæðismanna, sem eru í minnihluta bæjarstjórnar. Sjálfstæðismenn vildu fá svör hvers vegna Guðrúnu Pálsdóttur bæjarstjóri hafi verið sagt upp störfum.

Ármann segir að sjálfstæðismenn hafi fengið lítil og loðin svör við fyrirspurnum sínum. „Við lögðum því fyrirspurnina fram skriflega og vonumst til að fá svör skriflega á fimmtudagsmorgun," segir Ármann. Hann segir að meirihlutinn sé fallinn í bænum, enda sé málið gífurlega stórt.

Þrátt fyrir að Hjálmar hafi sagt skiliði við meirihlutann er hann ekki kominn til liðs við minnihlutann, segir Ármann.

Aðspurður hvort að þeir muni funda eitthvað með Hjálmari eða minnihlutanum, í kvöld segir Ármann: „Það verður að koma í ljós, þessi mynd þarf eitthvað að skýrast. Maður er bara að átta sig á tíðindunum." segir hann.

Samfylkingin, Vinstri Grænir og Listi Kópavogsbúa sendu frá yfirlýsingu nú fyrir stundu þar sem uppsögn Guðrúnar er rökstudd. Segir meðal annars þar að hún hafi starfað hjá bænum sem fjármálastjóri og sviðsstjóri.

„Reynsla Guðrúnar í fjármálastjórnun hefur að sönnu reynst vel en hins vegar hefur sú staðreynd að Guðrún hefur starfað lengi hjá bænum gert henni erfitt fyrir að fylgja eftir breytingum innan stjórnsýslunnar. Þar sem brýnt er að þær gangi hratt og vel fyrir sig töldum við einsýnt að annar einstaklingur þyrfti að taka við því verkefni. Sú ákvörðun var erfið en eigi að síður nauðsynleg. Við urðum því sammála um að hún léti af starfi bæjarstjóra," segir meðal annars í tilkynningunni.