Straumsvíkurmálið þingfest

Þingfesting fór fram í morgun í Straumsvíkurmálinu svokallaða gegn sjö einstaklingum. Stærsti hluti málsins snýst um stórfellt smygl á fíkniefnum frá Rotterdam til Straumsvíkur. Lagði lögreglan hald á tæp tíu kíló af amfetamíni, rúmlega átta þúsund töflur af MDMA og mikið magn stera.

Fleiri smærri fíkniefnamál tengjast stóra smyglinu. Þeir ákærðu sem mættu fyrir dóminn í morgun játuðu allir sök að hluta, utan einn, sem neitar sök. Þá hefur enn ekki tekist að birta einum hinna grunuðu ákæruna og einn lá veikur heima þegar málið var þingfest.

Einn hefur setið í gæsluvarðhaldi frá því málið kom upp í október og annar grunaður hefur hafið afplánun vegna annars máls.