Annar höfuðpauranna neitar sök

Ákæra í einu stærsta fíkniefnamáli síðasta árs var þingfest í Héraðsdómi Reykjavíkur í morgun. Annar höfuðpauranna neitar sök í stærsta ákæruliðnum.

Sex manns eru ákærðir í málinu sem snýst um umfangsmikil fíkniefnabrot. Stærsti hluti málsins snýst um stórfellt smygl á fíkniefnum frá Rotterdam í Hollandi til Straumsvíkur. Við rannsókn málsins lögðu lögreglumenn hald á tæp tíu kíló af amfetamíni, rúmlega átta þúsund töflur af MDMA og mikið magn stera.

Höfuðpaurarnir í málinu eru þeir Geir Hlöðver Ericsson og Sævar Sverrisson. Þeir eru ákærðir fyrir að hafa skipulagt innflutninginn á efnunum og séð til þess að þau yrðu flutt til landsins frá Rotterdam. Geir Hlöðver neitar sök í þessum ákærulið en Sævar játar að hafa staðið að innflutningi stera en segist ekki vita að um önnur fíkniefni hafi verið að ræða.

Fleiri smærri fíkniefnamál tengjast stóra smyglinu. Þeir ákærðu sem mættu fyrir dóminn í morgun játuðu allir sök að hluta, utan einn, sem neitar sök. Þá hefur enn ekki tekist að birta einum hinna grunuðu ákæruna og einn lá veikur heima þegar málið var þingfest. Þau munu því lýsa yfir afstöðu til ákæruefnisins síðar.

Sævar Sverrisson hefur setið í gæsluvarðhaldi frá því málið kom upp í október og Geir Hlöðver afplánar nú dóm vegna annars máls.