Slæmt veður víðast hvar um landið

Slæmt veður er nú víða um land. Hálka og óveður er á Hellisheiði, hálka og skafrenningur í Þrengslum og snjóþekja víða á Suðurlandi að því er fram kemur á vef Vegagerðarinnar. Á Mosfellsheiði og Lyngdalsheiði er skafrenningur og þæfingsfærð og óveður frá Hellu og austur fyrir Vík í Mýrdal. Á Suðurnesjum er snjóþekja á flestum vegum og skafrenningur á Reykjanesbraut.

Á Vesturlandi, Vestfjörðum og Norðurlandi vestra og á Austurlandi er hálka eða snjóþekja á flestum leiðum. Á Norðurlandi eystra er víða snjóþekja og snjókoma . Þæfingsfærð og óveður er á Möðrudalsöræfum en óveður og ófært á Mývatnsöræfum. Óveður er á Breiðdalsheiði, í Berufirði og í Hamarsfirði. Óveður er undir Eyjafjöllum og á Mýrdalssandi.