Tvöfalt fleiri umsóknir um greiðsluaðlögun

Talið er að tvöfalt fleiri sæki um greiðsluaðlögun hjá Umboðsmanni skuldara núna í janúar heldur en í jólamánuðinum. Rösklega 3800 heimili hafa nú sótt um þetta úrræði. Upplýsingafulltrúi segir lagaleg álitamál tefja úrvinnslu mála.

Þetta eru rúmlega þrjú prósent allra heimila í landinu sem telja sig þannig svo illa stödd að þau verði að leita samninga við kröfuhafa sína. 17 heimili sóttu um greiðsluaðlögun í desember - en núna um miðjan janúar voru umsóknirnar þegar orðnar 19, og búist er við að þær verði tvöfalt fleiri.

Svanborg Sigmarsdóttir, upplýsingafulltrúi Umboðsmanns skuldara segir að þetta sé ekkert nýtt, sumir ákveði að leggja fjárhagserfiðleika sína til hliðar í jólamánuðinum og hefji svo nýtt ár á því að endurskoða fjármál sín.

Búið er að ráða tvo ráðgjafa og koma upp útibúi á Akureyri. Svanborg segir ekki hafa fjölgað umsóknum þaðan, en reynslan sýni að fleiri mæti þegar fulltrúi kemur á staðinn.

Af þessum 3823 umsóknum er aðeins búið að ná samningum við kröfuhafa í 302 tilvikum, en nauðasamningar hafa verið staðfestir í 6 málum. Svanborg segir vikulega fundi með bönkum og kröfuhöfum hafa hjálpað til við vinnslu mála. Ástæðuna fyrir því hve hægt gangi segir Svanborg vera þá að í ferlinu hafi menn lent á nokkrum þröskuldum, ákveðin mál hafi komið upp sem lögin leysi ekki og því hafi það valdið töfum.