Formenn aðildarfélaga ASÍ funda um framtíð kjarasamninga

Það ræðst í dag hvort gildandi kjarasamningum verður sagt upp. Formenn aðildarfélaga Alþýðusambandsins funda um málið eftir hádegi en frestur til að virkja endurskoðunarákvæði samninganna rennur út á morgun. Rætt var um málið á Alþingi í morgun þar sem stjórnarandstaðan sakaði ríkisstjórnin um stefnuleysi í atvinnumálum.

Aðilar vinnumarkaðarins telja að ríkisstjórnin hafi ekki staðið við viljayfirlýsingu sem var undirrituð í tengslum við gerð kjarasamninga síðasta vor.

AFL starfsgreinafélagið hefur nú þegar samþykkt að segja upp samningunum en formenn aðildarfélaga ASÍ ætla að funda um málið í dag. Frestur til að virkja svokallað endurskoðunarákvæði samninganna rennur út klukkan fjögur á morgun.

Rætt var um stöðuna á vinnumarkaði í fyrirspurnartíma á Alþingi í morgun.

Birkir J. Jónsson, þingmaður Framsóknarflokks, sakaði ríkisstjórnina um stefnuleysi í atvinnumálum og vísaði meðal annars í tölur hagstofunnar þar sem fram kemur að störfum á vinnumarkaði hafi fækkað um þrjú þúsund á síðasta ári.

Jóhanna Sigurðardóttir, forsætisráðherra, sagði að ríkisstjórnin væri öll að vilja gerð til að til að tryggja frið á vinnumarkaði og hvatti aðila vinnumarkaðarins til að sýna sanngirni.