Kodak tapaði baráttunni við stafrænar ljósmyndir

Tímamót urðu í sögu ljósmyndatækninnar í dag þegar Kódak fyrirtækið í Bandaríkjunum óskaði eftir greiðslustöðvun. Atvinnuljósmyndari segist ekki sakna þeirra tíma þegar allar ljósmyndir voru teknar á filmu.

Kodak var stofnað fyrir hundrað og tuttugu árum og fyrirtækið var um áratuga skeið með yfirburðarstöðu á markaði með filmur og aðrar ljósmyndavörur. Fyrirtækið náði hins vegar ekki að tileinka sér stafræna tækni í ljósmyndun sem ruddi sér til rúms fyrir rúmum áratug og því fór sem fór.

Gunnar V. Andrésson sem hefur starfað sem fréttaljósmyndari í nærri hálfa öld segir þetta vera tákn um breytta tíma. „Ég verslaði mikið við Kodak í gamla daga en þegar ég fór yfir í stafræna myndavél þá var það eins og að byrja í nýrri vinnu - þar með kvaddi ég viðskipti mín við Kodak."

Gunnar segist ekki sakna þess að þurfa framkalla filmur í myrkrakompu. „Maður var útsullaður. Maður skemmdi föt og maður þurfti nánast að fara í bað eftir langan dag í myrkrakompu og skipta um föt."

Ljósmyndavöruverslun Hans Petersen fékk Kodak umboðið hér á landi árið 1918. Framkvæmdastjóri verslunarinnar segir að markaðurinn hafi tekið miklum breytingum á síðustu tíu árum.

Ólafur segir að alltof margir gleymi að prenta myndir sem eru teknar með stafrænum hætti. Fólk geymi þær í tölvunni og mikil hætta sé á að þær glatist þegar tölvan bilar. „Það er gat í fjölskyldusögu íslendinga - tíu ára gat. Ég held að við eigum eftir að sjá ljósmyndina og prentun á myndum koma aftur til baka."