Tökulið Noah í vanda vegna óveðursins

Ofsaveðrið á austurströnd Bandaríkjanna seinkar framleiðslu fjölda kvikmynda og sjónvarpsþátta sem voru í bígerð. Los Angeles Times segir það nokkuð kaldhæðnislegt að ein þessara mynda sé Noah. Eftir að tökum á myndinni lauk hér á Íslandi hófu menn að taka í vestanhafs.

Tökum á myndinni var frestað í gær vegna óveðursins en menn spyrja sig hvað verður um annan bátinn sem var smíðaður fyrir tökurnar. Hann er staðsettur í Oyster Bay í New York, þar sem óveðrið skall á. Los Angeles Times segir að báturinn hafi ekki verið sjófær og líklegt sé að hann verði fyrir nokkrum skemmdum. Það myndi væntanlega tefja tökur um nokkra daga ef það ætti að gera við hann.

Og fyrir þá sem eru farnir að hlakka til að sjá Noah er því við að bæta að hún verður frumsýnd í mars 2014.