Engin sundlaug í Fossvoginn í bili

Ólíklegt má telja að sundlaug í Fossvoginum verði að veruleika á allra næstu árum en borgarstjóri og bæjarstjórinn í Kópavogi ræddu málið á fundi fyrir helgina.

Reykjavíkurborg óskaði eftir viðræðum við Kópavogsbæ um málefni Fossvogsdalsins til að ræða göngu og hjólabrú yfir Fossvoginn og nýja sundlaug. Borgarstjóri og bæjarstjórinn í Kópavogi hittust á fundi fyrir helgi til að ræða þessi mál. Ármann Kr. Ólafsson bæjarstjóri í Kópavogi segir ólíklegt að sundlaug verði reist í Fossvoginum á allra næstu árum. Viðræður séu skammt á veg komnar.

„Þessar hugmyndir eru eldgamlar ef svo má segja. Þær hafa legið í láginni um allnokkurt skeið hjá okkur og eins hjá borginni. Við höfum ákveðið að taka upp viðræður á ný varðandi þessa gömlu hugmynd. Ég held að það megi segja það að þetta sé á allra fyrstu stigum, á frumstigi. Það var ekkert rætt varðandi framkvæmdir á því heldur eingöngu að horfa til þess hvernig sundlaugin geti komið inn á skipulag í Fossvogsdalnum þannig að bæði sveitarfélögin gætu vel við unað," segir Ármann.

Hann segir mikilvægt að það liggi skýrt fyrir áður en tekin verði ákvörðun um hvort að farið verð í verkefnið hvernig kostnaðurinn muni skiptast á milli Kópavogs og Reykjavíkur.

„Það er að sjálfsögðu áhugi en ég tek það þó fram að við erum að borga náttúrulega umtalsverða peninga með þeim sundlaugum sem við erum að reka í dag. Þannig að við þurfum að sjá alveg fyrir endann á því hvernig að þeim rekstri yrði staðið. Þannig að það þarf algjörlega að vera skýrt hvernig það mun koma út fyrir bæjarsjóð sá rekstur," sagði Ármann Kr. Ólafsson.