Skiptibókamarkaðirnir mæta þörf

Skiptibókamarkaðir eru ekki ástæðan fyrir slæmri stöðu á markaði fyrir kennslubækur. Það segir Kjartan Örn Sigurðsson, forstjóri Office 1, sem er meðal þeirra bóksala sem halda úti skiptibókamarkaði allt árið um kring.

Í Fréttablaðinu á laugardag voru áhyggjur bókaútgefenda tíundaðar og sagðist Egill Örn Jóhannsson, framkvæmdastjóri Forlagsins, ekki sjá fram á að geta þróað eða gefið út nýjar kennslubækur næstu ár vegna hruns í sölu.

Kjartan Örn segir hins vegar að skiptibókamarkaðir verslana séu ekki orsakavaldurinn, og þeir muni alltaf verða til.

„Stóra ástæðan bak við vandræði í útgáfu kennslubóka er fámennið á Íslandi. Hér þarf miklu frekar að hugsa til þess að rafbókavæða markaðinn fyrir kennslubækur. Þá er hægt að treysta á miklu minni útgáfu en á prentuðum bókum."

Hann segir skiptimarkaði vera svar við kröfum viðskiptavina. „Við erum í miðri kreppu og námsmenn eru athugulir kúnnar sem leita auðvitað að bestu kjörunum hverju sinni. Við stjórnum ekki neytandanum í þessu máli, heldur mætum við þörfinni í samfélaginu." - þj