U-21 landsliðið spilar æfingaleik við England í mars

Knattspyrnusamband Íslands hefur tilkynnt að U-21 landslið karla muni spila æfingaleik gegn Englandi þann 28. mars næstkomandi. Leikurinn verður spilaður á heimavelli Preston North End, Deepdale-leikvanginum.

Leikurinn er liður í undirbúningi beggja liða fyrir úrslitakeppni EM sem fer fram í Danmörku næsta sumar.

Að honum loknum mun liðið halda til Kænugarðs þar sem liðið mætir Úkraínu þremur dögum síðar.

Ísland leikur í A-riðli á EM í sumar ásamt Sviss, Danmörku og Hvíta-Rússlandi.

England og Úkraína eru bæði í B-riðli með Spánverjum og Tékkum.