Aðalmeðferð í njósnamálinu í dag

Aðalmeðferð í máli ákæruvaldsins gegn Þorsteini Húnbogasyni, fyrrum sambýlismanni Sivjar Friðleifsdóttur alþingismanns, fer fram eftir hádegi í Héraðsdómi Reykjavíkur í dag. Hann er grunaður um að hafa njósnað um Siv með því að hafa komið ökurita fyrir í bifreið hennar. Þau voru í sambúið í tuttugu og sex ár.

Við þingsetningu málsins þann 9. septemer síðastliðinn sagðist Þorsteinn vera saklaus af ákærunni. Hann var ákærður í júní síðastliðnum en hið meinta eftirlit stóð yfir á síðari hluta ársins 2010. Rannsókn málsins stóð yfir hluta síðasta vetrar hjá lögreglunni á höfuðborgarsvæðinu og var Þorsteinn meðal annars boðaður í skýrslutöku og samkvæmt upplýsingum fréttastofu sóttu á heimili sitt af þónokkru liði lögreglumanna.

Samkvæmt heimildum fréttastofu hefur Þorsteinn haldið því fram að hann hafi ekki notið sanngjarnrar málsmeðferðar hjá lögreglu.

Samkvæmt ákæru er Þorsteinn ákærður fyrir brot á lögum um fjarskipti með því að hafa komið staðsetningarbúnaði fyrir í ólögmætum tilgangi og án vitundar umráðamanns bifreiðarinnar, sem er fyrrum sambýliskona hans, Siv Friðleifsdóttir.

Einnig segir í ákærunni að hann hafi komið búnaðinum fyrir í bifreiðinni í þeim tilgangi að fylgjast með ferðum hennar á tímabilinu 21. september 2010 til og með 18. nóvember 2010. Þá segir að Þorsteinn hafi haft aðgang á internetinu þar sem öllum upplýsingum úr búnaðinum er safnað saman á læstan aðgang hans.

Saksóknari krefst þess að Þorsteinn verði dæmdur til refsingar og greiðslu alls sakarkostnaðar, en samkvæmt lögum um fjarskipti varða brot á þessum lögum sektum, fangelsi allt að sex mánuðum ef sakir eru mildar eða brot ítrekuð.

Aðalmeðferðin fer fram í dag, eins og fyrr segir, í Héraðsdómi Reykjavíkur.