Fegurðardís vinsæl á Facebook

„Það vilja allir vera vinir manns," segir Sigríður Dagbjört Ásgeirsdóttir, Ungfrú Reykjavík, sem hefur ekki undan að samþykkja vinabeiðnir á Facebook. „Maður samþykkir flesta en ég skoða samt vel og vandlega hverjum ég er að hleypa inn á Facebook." Hún er á lausu og viðurkennir að einhverjir hafi reynt við sig eftir að titillinn var í höfn. „Það hefur verið eitthvað um það en ekkert rosalega mikið."

Sigríður Dagbjört, sem er tvítug Kópavogsmær, hefur svifið um á bleiku skýi undanfarna daga eftir sigurinn í Ungfrú Reykjavík. Þangað til undirbúningur fyrir Ungfrú Ísland hefst ætlar hún þó að einbeita sér að náminu í viðskiptafræði við Verslunarskóla Íslands. Þar er hún á lokaári og útskrifast einmitt daginn eftir að Ungfrú Ísland verður krýnd á Broadway 20. maí. „Ég ætla að taka því rólega núna í byrjun mars og svo fer maður að byrja aftur í svipuðu prógrammi. Þá kíkir maður í ræktina þegar maður getur og reynir sérstaklega að borða hollt," segir hún. Fegurðardísin hefur í nógu að snúa þessa dagana sem formaður nemendamótsnefndar Versló því verið er að setja upp söngleikinn Draumurinn.

Sigurinn í Ungfrú Reykjavík kom henni í opna skjöldu. „Auðvitað. Það sést líka á myndbandinu. Ég er alveg í sjokki þar. Ég bjóst ekki við þessu og var farin að hugsa hver myndi eiginlega vinna þetta þegar það var búið að setja í þriðja og annað sætið."

Á ekki að stefna að sigri í næstu keppni? „Ég ætla bara að gera mitt besta. Ég held að það sé ekkert annað sem ég get gert." - fb